M

Mahmudbəyov Mahmud bəy Poladbəy oğlu

Mahmudbəyov Mahmud bəy Poladbəy oğlu (1863-1923) - maarif xadimi, pedaqoq, naşir. Şamaxı şəhər məktəbində oxumuş (1870-1879), Qori müəllimlər seminariyasını bitirmişdir (1883). İrəvan-Yelizavetpol quberniyasının ibtidai məktəblərində müəllimlik etmiş (1883-1896), 1897-1918 illərdə Bakıda "Rus-müsəlman" məktəblərində müəllim və müdir olmuşdur. "Birinci il" (1907), 'İkinci il" (1908; S.Əbdülrəhmanbəyzadə, S.Axundzadə və b. ilə birgə), "Yeni məktəb" (1909; Abbas Səhhətlə birgə), "Türk ədəbiyyatına ilk qədəm" (1914; Abbas Səhhətlə birgə) dərsliklərinin, "İmlamız" (1911) kitabının müəllifidir. O, Azərb.-da K.D.Uşinskinin ardıcıllarından olmuş, ana dilinin saflığı, milli ədəbiyyatın dirçəlişi uğrunda mübarizə aparmışdır.

M. '"Rəhbər" (1906-1907), "Maarif” (1921, S.M.Qənizadə və Ə.İ.Cəfərzadə ilə) jurnallarının naşiri və red. olmuşdur. Məmmədquluzadə ilə seminariyada təhsil illərindən tanış idi. '"İkinci il" ilk dəfə 1908 ildə Tiflisdə Məmmədquluzadənin "Qeyrət" mətbəəsində nəşr olunmuşdur. "Molla Nəsrəddin" jurnalı xüsusi elan dərc etmiş, kitabı, mövzuları Qafqaz müsəlmanlarının həyatından alınmış milli dərslik kimi səciyyələndirmişdir. Məmmədquluzadə "Zəncir" felyetonunda "İkinci il" dərsliyini Əli bəy Hüseynzadənin hücumlarından qorumuşdur. "Yeni məktəb" dərsliyi isə "Molla Nəsrəddin" jurnalında "Səhhətnamə" adlı məqalədə tənqid olunmuşdur. Məmmədquluzadə "Rəhbər" jurnalının nəşri münasibətilə eyniadda məqalə yazmışdır.