S

Sultanov Fərəc bəy Zeynal oğlu

Sultanov Fərəc bəy Zeynal oğlu (1862-1914) - pedaqoq. Qori seminariyasında, Tiflisdə Aleksandrovski Müəllimlər İn-tunda təhsil almışdır (1884). Tələbə ikən inqilabi xalqçılıq ideyaları ilə yaxından maraqlanmış, gizli polis nəzarəti altında olmuşdur. S. 1886-1888 illərdə Naxçıvan şəhər məktəbində inspektor köməkçisi vəzifəsində çalışmışdır. Sonralar Tiflisdə yaşamış, ruhani idarəsində və şiə məktəbində işləmişdir. Şeirlər yazmışdır. 1893 ildə SMOMPK məcmuəsində "Əli-allahilik təriqəti haqqında bəzi qeydlər" adlı elmi-publisist əsəri çap edilmişdir. M. ilə Naxçıvan şəhər məktəbində çalışdığı dövrdə tanış olmuşdur. Tədqiqatçıların fikrincə, "Əliallahilik..." məqaləsində M.-nin "Ölülər" əsərinin mövzusu, xüsusilə Şeyx Nəsrullah obrazı ilə səsləşən məqamlar var.