Ş

Şeytanbazar

Şeytanbazar - Tiflisin köhnə məhəllələrindən birinin danışıqda, dövri mətbuatda, habelə bədii ədəbiyyatda işlənən adı. XX əsrin əvvəllərində müsəlman aləminə məxsus tipik səhnələri, o cümlədən geriliyi əks etdirən bu məhəllə Tiflisin müxtəlif zümrədən olan əhalisi üçün münasib bir bazar və görüş yeri idi. Bu məhəllədə hər cür məişət əşyası, qab-qacaq, yemək-içmək və s. satılırdı. Ş.-da həmçinin müxtəlif incəsənət adamları və dolanışığa kömək edən ustalar (çalğıçılar, xırda ustalar, bənnalar, hamballar, faytonçular və b.) olurdu.

Restoran və çayxanaları görüş yerlərindən idi. Ş.-ın köhnədən qalma kiçik müsəlman hamamları haqqında mətbuatda, bədii ədəbiyyatda, xüsusilə, satirik əsərlərdə məzəli, maraqlı təsvirlərə, əhvalatlara təsadüf edilir. M.-nin Tiflisdə yaşadığı bina buraya yaxın olduğundan ədibin yolu çox vaxt Ş.-dan düşürdü. O, burada gördüyü canlı, rəngarəng həyal və məişət lövhələri barədə yazmağa ehtiyac duyduğunu belə izah edirdi: "Tiflisin Şeytanbazarında rast gəldiyim islam aləmi hər gün və hər saat məni yazmağa vadar edirdi. Material o qədər idi ki..." (Məmmədquluzadə C. Əsərləri. VI c, s. 152). "Molla Nəsrəddin"də məzəli, gülünc, ibrətli lövhələr və əhvalatların mühüm qismi Ş. mənzərələrindən əxz olunmuşdur.